01/02/2013 18:58:55

Të mos identifikohesh me të tjerët

nga Doriana Metollari

HermesNews.org - Identifikimi me të tjerët është një nga "viruset" më të përhapura. Shikoni rreth e rrotull, ngjyra dhe veshje të njëjta, dëshira për të qenë në një modë me idhujt, pa menduar se mund të mos jetë e përshtatshme për të gjithë. Kjo është aq e zakonshme sa të gjithë i përshtaten pa protestuar qoftë një here të vetme.

E shoh si një dëshirë të brendshme për të zënë vendin e dikujt tjetër, sepse është gjëja më e thjeshtë për të bërë. Askush nuk ka "nge" të bëjë "betejat" që të bëjnë "njeri" pra një personalitet dhe stil që bën për ty. Pse ? Frikë nga gjykimet apo me keq paragjykimet e një turme që gdhijnë e ngrysin nën slloganin "si gjithë të tjerët". Më kujtohet shumë mirë një film shqiptar që mbante këtë titull i cili sigurisht ishte pjesë e një kohe të atëhershme dhe sa mirë që ishte "ateherë"...!

A keni menduar ndonjëherë të mos idendifikohesh me turmën ? Fillimisht të kërkosh brenda teje dhe të nxjerresh "të vërtetatat" që ty, sidomos ty, të ndihmojnë të dalësh nga turma për të mos u identifikuar me paragjykimet, slloganet e përgjithshme, shijet e përgjithshme.

Të krijosh shtysën e parë, do të thotë të përballesh me frikën e vuajtjes që secili prej nesh, herët e vonë duhet ta bëjë, për arsye nga më të ndryshme. Eshtë hapi i parë, më i rëndesishmi drejt një të nesërme që identifikohet vetëm me dëshirat, bagazhin, intelektin dhe gjithçka që të bën të ndjehesh vetvetja.

Kjo sigurisht kërkon jo vetëm përqëndrim, por më shumë se kaq, kanalizim të energjive. Vëmendje që shkon atje ku truri, e jo frika, ia thotë dhe mbi të gjitha kërkon "frymëmarrje të re". Nuk flas për ajrin e pastër, që është i nevojshëm, por një kombimin i të dobishmes me kultivimin e një vullneti që sheh drejt objektivit për t'a arrirë.

E nëse gaboni, quajeni gjithsesi një fitore, sepse gabimi, sidomos gabimi, është indeks i faktit që keni filluar të vini në lëvizje, atë pjesë të energjive, që deri tani ju ka mbajtur në një nivel mentaliteti, jetese, dëshirash. Pra quajeni hapin e parë. Unë kam gabuar, uhhh kush e di sa herë dhe meqë ra fjala, gaboj ende sot. E quaj trajnim vetjak, ju ?

HermesNews - ©2013

Dërgo me email | Stampo artikullin